Ökunám til almennra ökuréttinda getur hafist við 16 ára aldur og getur nemandi þá fengið réttindi til æfingaaksturs. Þeir sem ekki hyggjast fara í æfingaakstur byrja oftast ekki fyrr en nokkrum mánuðum fyrir 17 ára aldurinn. Fyrsta skerfið er að velja ökukennara. Hann annast verklega kennslu og leiðir nemann gegnum allt ökunámið og prófin.

Kennsluakstur

Lágmarksfjöldi ökutíma getur aldrei orðið minni en 16 tímar skv. núgildandi reglum og er þá miðað við 45 mín. kennslustund. Nýti nemandi sér heimild til að æfa sig með leiðbeinanda (æfingaakstur) er algengt að teknir séu nálægt 10 tímar fyrir æfingaaksturinn og svo 6 tímar rétt fyrir ökuprófið sjálft (lágmarkstímafjöldi).

Ökuskólinn, fyrri hluti

Fljótlega eftir að verkleg kennsla hefst þarf neminn að sækja fyrri hluta bóklegs náms í ökuskóla (nefnt Ö1). Verklegri kennslu er haldið áfram samhliða og í beinu framhaldi af náminu í ökuskólanum.

Æfingaakstur

Æfingaakstur með leiðbeinanda getur byrjað þegar neminn er orðinn 16 ára og hefur náð nokkuð góðum tökum á akstri hjá ökukennara (u.þ.b. 10 tímar) og eftir fyrri hluta náms í ökuskóla. Ökukennarinn vottar að neminn sé tilbúinn til að hefja æfingaakstur. Lögreglustjóri gefur þá út leyfi til æfingaaksturs.

Síðari hluti ökuskóla og próf

Seinni hluti ökuskóla (Ö2) er oftast sóttur þegar nær dregur prófi. Verkleg kennsla heldur áfram samhliða Ö2 og þar til ökukennari telur nema tilbúinn í próf.

Prófin

Frumherji hf. sér um prófið sem er bæði bóklegt og verklegt. Bóklega prófið má nemandi taka 2 mánuðum áður en 17 ára aldrinum er náð en verklega prófið ekki fyrr en viku fyrir 17 ára afmælið. Verklega prófið er tekið á kennslubílinn sem nemandinn hefur lært á.

Hvenær er rétt að fara í ökuskóla?

Allir sem vilja öðlast almenn ökuréttindi þurfa að fara í ökuskóla. Lengd námskeiða er 24 kennslustundir og er þeim skipt í tvö námskeið, fyrri hluta (Ö1) og seinni hluta (Ö2). Fyrri hlutinn er oftast tekinn fljótlega eftir að ökunemi hefur byrjað nám hjá ökukennara en síðari hlutinn skömmu áður en nemandi ætlar í próf. Áður en æfingaakstur getur hafist þarf nemandi að hafa lokið fyrri hluta ökuskólans.

Hvaða ökuskóla vel ég?

Nokkrir ökuskólar eru á höfuðborgarsvæðinu. Flest námskeið eru að kvöldlagi en nokkrir skólar bjóða uppá helgarnámskeið. Oftast byrja nemendur á því að fá sér ökukennara áður en þeir fara í ökuskóla og leiðbeinir hann þá um val á ökuskóla og þekkir tímasetningar námskeiða sem geta hentað viðkomandi.

Hvað er kennt í ökuskóla?

Á námskeiðum er farið yfir grundvallaratriði er snerta skilning á umferðinni, helstu umferðarreglur, umferðarmerki, umferðarsálfræði, verkefni unnin o.fl. Einnig er aðstoðað við undirbúning ökuprófs.